ភ្នំពេញ៖ ចេញផ្សាយ ថ្ងៃសៅរ៍ ៥កើត ខែចេត្រ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៨ ខែមីនា ឆ្នាំ២០២០ ។
ក្រសួងសាធារណការ និងដឹកជញ្ជូន នឹងធ្វើការកែលម្អឡើងវិញនូវកំណាត់ផ្លូវជាតិលេខ៧ លេខ៧៣ លេខ៣៧៧ និង៣៧៧A ដែលស្ថិតក្នុងខេត្តត្បូងឃ្មុំ និងខេត្តក្រចេះ នឹងត្រូវតែកែលម្អទៅលើកគុណភាពឲ្យបានប្រសើរឡើងវិញ។
តាមរបាយការណ៍របស់ក្រសួងសាធារណការ និងដឹកជញ្ជូន បានបង្ហាញនៅថ្ងៃទី២៧ ខែមីនា ឱ្យដឹងថាផ្លូវជាតិលេខ៧ (គ.ម ៣០០ ដល់ ៣៣១+២៥០) ផ្លូវជាតិលេខ៧៣ (គម ០០ ដល់ ៥០+០០០) ផ្លូវខេត្តលេខ ៣៧៧ (គមលេខ ០០+៥០០ ដល់ ៣៦+០០០) និង ៣៧៧A (គមលេខ ០០+០០០ ដល់ ១៣+៦០០) ស្ថិតក្នុងខេត្តត្បូងឃ្មុំ និងខេត្តក្រចេះ ដើម្បីកែលម្អលើកគុណភាពឲ្យប្រសើរឡើងវិញ ។
តាមប្រភពដដែលគម្រោងកែលម្អនេះ ត្រូវបានផ្តល់ហិរញ្ញប្បទានវិនិយោគដោយធនាគារពិភពលោក (World Bank) ដែលនឹងធ្វើការចាក់អ៊ុតក្រាលកៅស៊ូ AC និងកៅស៊ូពីរជាន់ DBST ព្រោះវារឹងមាំធន់ទៅនឹងការបម្រែបម្រួលអាកាសធាតុ សំដៅជួយសម្រួលដល់ការធ្វើដំណើរពីតំបន់ជនបទ ឆ្ពោះទៅកាន់សាលារៀន មណ្ឌលសុខភាព ផ្សារ ទីប្រជុំជន និងបណ្តាញផ្លូវសំខាន់ៗ ផ្សេងទៀត ។
(និពន្ធនាយក ម៉ុន សាមាស)
