ភ្នំពេញ៖ ចេញផ្សាយ ថ្ងៃអង្គារ៍ ១៤រោច ខែចេត្រ ឆ្នាំជូត ទោស័ក ព.ស ២៥៦៤, ត្រូវនឹងថ្ងៃទី២១ ខែមេសា ឆ្នាំ២០២០។
ព្រៃវែង៖ នៅរសៀលថ្ងៃទី ២០ ខែមេសា ឆ្នាំ២០២០នេះ សាខាកាកបាទក្រហមកម្ពុជាខេត្តព្រៃវែងដឹកនាំដោយឯកឧត្តម ឧកញ្ញ៉ា សុខ ផេង អនុប្រធានអចិន្ត្រៃយ៍គណៈកម្មាធិការសាខាខេត្ត ក្រុមប្រតិបត្តិសាខាបាន អញ្ជើញចុះសួរសុខទុក្ខ និងបាននាំយកអំណោយមួយចំនួនមក ចែកជូនដល់កុមារកំព្រា ដែលស្នាក់នៅមជ្ឈមណ្ឌលកុមារកំព្រានិងសហព័ន្ធនារីពិការក្នុងខេត្តព្រៃវែង។
ថ្លែងនៅក្នុងឱកាសនោះដែរ ឯកឧត្តម ឧកញ្ញ៉ា បាននាំយកនូវប្រសាសន៍ផ្ដាំផ្ញើសាកសួរសុខទុក្ខពីសម្ដេចគតិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា សម្ដេចតែងតែគិតគូរអំពីសុខទុក្ខរបស់បងប្អូនប្រជាពលរដ្ឋ ប្អូនៗ កុមារកំព្រា ប្អូនៗដែលជាជនពិការទាំងអស់នៅក្នុងខេត្តព្រៃវែងនេះដោយមិនទុកបងប្អូនណាម្នាក់ចោលនោះទេ។ ដោយឡែកនៅពេលបច្ចុប្បន្ននេះ ប្រទេស ជាច្រើននៅលើពិភពលោក បាននិងកំពុង ទទួលរង នូវការគំរាមកំហែង នៅជម្ងឺ Covid 19 និងបានសម្លាប់មនុស្សរាប់ម៉ីននាក់ ដោយឡែកនៅក្នុងប្រទេសកម្ពុជា ជម្ងឺនេះ ក៏មានការឆ្លងហើយក៏មានការព្យាបាលជាសះស្បើយបានច្រើននោះមកហើយដែរនេះបើតាមការប្រកាស់របស់ក្រសួងសុខាភិបាល។
ឯកឧត្តម ឧកញ៉ា ក៏សូមអំពាវនាវដល់ប្អូនៗដែលជាកុមារកំព្រា និងប្អូនៗដែលជាជនពិការទាំងអស់ត្រូវ មានការប្រុងប្រយ័ត្នអោយបានខ្ពស់ចំពោះការឆ្លងនូវជម្ងឺ Covid 19 នេះ ទោះបីជាចំនួនអ្នកឆ្លងនូវជម្ងឺ Covid19 នៅក្នុងប្រទេសកម្ពុជា បានព្យាបាលជាសះស្បើយច្រើនក៏ពិតមែន ក៏ប៉ុន្តែត្រូវតែបន្តអនុវត្ត តាមការណែនាំរបស់ក្រសួងសុខាភិបាលឲ្យបានជាប់ជាប្រចាំដើម្បីចូលរួមក្នុងការទប់ស្កាត់មិនឲ្យមានការរីករាលដាលឆ្លងនូវជម្ងឺ Covid19 មកខ្លួនយើង និងនៅក្នុងសហគមន៍យើង ដោយត្រូវលាងដៃឲ្យបានញឹកញាប់ជាមួយសាប៊ូ និងទឹកស្អាត ឬទឹកអាល់កុលលាងដៃ ខ្ទប់មាត់ និងច្រមុះ នៅពេលក្អក ឬកណ្តាស់ ដោយប្រេីកែងដៃ ឬក្រដាសអនាម័យ រួចបោះចោលក្នុងធុងសំរាមឲ្យបានត្រឹមត្រូវ ជៀសវាងប៉ះពាល់ជិតស្និទ្ធជាមួយអ្នកដែលមានគ្រុនក្ដៅ ក្អក ឬផ្ដាសាយ ជៀសវាងប៉ះពាល់ភ្នែក ច្រមុះ ឬមាត់ ត្រូវបរិភោគអាហារដែលចម្អិនបានឆ្អិនល្អ ស្វាគមន៍គ្នាដោយសំពះ ជំនួសការចាប់ដៃ។
សូមបញ្ជាក់ថា៖ សម្ភារៈដែលសាខាកាកបាទក្រហមកម្ពុជាខេត្តព្រៃវែងផ្ដល់ជូនដល់មណ្ឌលកុមារកំព្រា នោះមាន ទឹកអាកុលចំនួន ៥ លីត្រ ផុស្ទ័រA3 ចំនួន ៥ ផ្ទាំង ផុស្ទ័រA4 ចំនួន ៥ សន្លឹក អង្គរ ៥០០ គីឡូក្រាម និងថវិកា ៣០ ម៉ឺនរៀល សម្រាប់សហព័ន្ធនារីពិការ ទឹកអាកុល ៥ លីត្រ ផុស្ទ័រA3 ចំនួន ៥ ផ្ទាំង ផុស្ទ័រA4 ចំនួន ៥ សន្លឹក អង្គរ ៣០០គីឡូក្រាម ថវិកា ២០ម៉ឺនរៀល៕
ម៉ុន សាមាស
