ភ្នំពេញ៖ ចេញផ្សាយ ថ្ងៃអាទិត្យ ១២កើត ខែពិសាខ ឆ្នាំជូត ទោស័ក ព.ស ២៥៦៤, ត្រូវនឹងថ្ងៃទី៣ ខែឧសភា ឆ្នាំ២០២០។
ព្រះសីហនុ៖ ថ្ងៃទី២ ខែឧសភា ឆ្នាំ២០២០។ លោក គង់ សោភា អភិបាលរងក្រុងព្រះសីហនុ អញ្ជើញចែកអំណោយមនុស្សធម៌ មានគ្រឿងឧបភោគ បរិភោគ ជូនដល់បុគ្គលិកអនាម័យក្រុងព្រះសីហនុ ដែលមានជីវភាពខ្វះខាតចំនួន ចំនួន២៥គ្រួសារ ដោយមានការចូលរួមពីសមាជិកក្រុមប្រឹក្សាក្រុង និងម្ចាស់អំណោយ ដែលជាសប្បុរសជន។ ពិធីចែកអំណោយមនុស្សធម៌នេះ ធ្វើឡើងនៅសាលាក្រុងព្រះសីហនុ កាលពីថ្ងៃសុក្រ ១០កើត ខែពិសាខ ឆ្នាំជូត ទោស័ក ព.ស ២៥៦៣ ត្រូវនឹងថ្ងៃទី១ ខែឧសភា ឆ្នាំ២០២០។
លោក គង់ សោភា អភិបាលរងក្រុងព្រះសីហនុបានគូសបញ្ជាក់ថា ដោយសារតែកម្ពុជាកំពុងប្រយុទ្ធប្រឆាំងនឹងជំងឺCovid-19 ដូច្នេះយើងត្រូវរស់នៅប្រកបដោយអនាម័យ ដោយលាង សម្អាតដៃជាមួយសាប៊ូ ទឹកស្អាត ជែល អាល់កុល ឱ្យបានស្អាតជាប្រចាំ ព្រោះជំងឺ Covid-19 វាជាសត្រូវលាក់មុខ។ លោកបានអំពាវនាវដល់បុគ្គលិកអនាម័យទាំងអស់ចូលរួមធ្វើអនាម័យក្នុងក្រុមគ្រួសារ ដើម្បីសុខភាព ចៀសផុតពីការឆ្លងរាលដាលជំងឺ Covid-19 នៅក្នុងសហគមន៍មូលដ្ឋានរបស់យើង។ លោកអភិបាលរងក្រុងក៏បានថ្លែងអំណរគុណដល់បងប្អូនសប្បុរសជន ដែលបានចូលរួមជួយឧបត្ថម្ភជាគ្រឿងឧបភោគ បរិភោគ តាមរយ:ការអំពាវនាវរបស់រដ្ឋបាលខេត្តព្រះសីហនុ ដើម្បីយកមកចែកជូនដល់បុគ្គលិកអនាម័យក្រុងព្រះសីហនុរបស់យើង ដែលមានជីវភាពខ្វះខាត។ ចំពោះគ្រឿងបរិភោគ និងឧបភោគទាំងនេះ វាអាចជួយសម្រួលការខ្វះខាតជីវភាពក្នុងបន្ទុកគ្រួសារបានមួយរយ:ផងដែរ ហើយវប្បធម៌ចែក រំលែកក្នុងសង្គម សម្រាប់ជួយគ្នាក្នុងគ្រាមានអាសន្ន និងការខ្វះខាតស្បៀងនាពេលបច្ចុប្បន្ន ។
សូមបញ្ជាក់ថា អំណោយដែលបានចែកជូនដល់ក្រុមអនាម័យសម្អាតក្រុង ចំនួន ២៥គ្រួសារ ដែលក្នុងនោះ ១គ្រួសារ ទទួលបានអង្ករ ២០គីឡូក្រាម មី ០១កេស ត្រីខ ០១ឡូ ទឹកត្រី ២ដប ទឹកស៊ីអ៊ីវ ២ដប ស្ករស ០,៥គីឡូក្រាម ប៊ីចេង ០,២៥គីឡូក្រាម សាប៊ូ ០១ដុំ ទឹកបរិសុទ្ធមួយកេស។ ដោយឡែកសមាគមប្រឹក្សាសុខភាពខេត្តព្រះ សីហនុ បានចូលរួមផ្តល់ម៉ាស់ ៥០០ ស្រោមដៃពេទ្យ ៥០០ និងទឹកអាល់កុល ១២លីត្រ ផងដែរ៕
