ភ្នំពេញ៖ ចេញផ្សាយ ថ្ងៃអាទិត្យ ៣កើត ខែជេស្ឋ ឆ្នាំជូត ទោស័ក ព.ស ២៥៦៤, ត្រូវនឹងថ្ងៃទី២៤ ខែឧសភា ឆ្នាំ២០២០។
លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត ខេត្តបន្ទាយមានជ័យបានធ្វើការអំពាវនាវទៅកាន់ប្រជាពលរដ្ឋទាំងអស់សូមជួយវេចខ្ចប់ទុកដាក់សំរាមឱ្យបានត្រឹមត្រូវចៀសវាងបោះសំរាមចោលពាសវាលពាសកាលដែលបង្កជាក្លិនស្អុយប៉ះពាល់ដល់បរិស្ថាន និងមុខមាត់ក្រុងយើង។ ការថ្លែងអំពាវនាវបែបនេះក្នុងឱកាសដែលលោកបានដឹកនាំយុទ្ធនាការអប់រំផ្សព្វផ្សាយអនាម័យបរិស្ថានក្រុង នៅសង្កាត់និមិត្ត ក្រុងប៉ោយប៉ែតខេត្តបន្ទាយមាន ជ័យ កាលពីព្រឹកថ្ងៃសៅរ៍ ២កើត ខែជេស្ឋ ឆ្នាំជូត ទោស័ក ព.ស២៥៦៤ ត្រូវនឹង ថ្ងៃទី២៣ ខែឧសភា ឆ្នាំ២០២០។
លោក គាត ហ៊ុល អភិបាលក្រុងប៉ោយប៉ែតបានណែនាំសូមឱ្យបងប្អូនប្រជាពលរដ្ឋកុំទម្លាក់សំរាម ឬសម្ភារផ្សេងៗចូលក្នុងលូរំដោះទឹក ដើម្បីបញ្ចៀសការកកស្ទះ។ ទន្ទឹមនេះ ត្រូវដាំដើមឈើ ឬដើមផ្កាផ្សេងៗនៅមុខផ្ទះដើម្បីលម្អធ្វើជាម្លប់និងកាត់បន្ថយការបំពុលបរិស្ថាន។ ចំពោះអ្នកបើកបរគ្រប់ប្រភេទត្រូវលាងសម្អាតរថយន្តខ្លួនឱ្យបានស្អាត មុននឹងបើកឡើងលើដងផ្លូវជាតិ ដើម្បីបញ្ចៀសការធ្លាក់ភក់លើផ្លូវដែលធ្វើឱ្យប៉ះពាល់ដល់សុខភាពនិងរំខានដល់អ្នកធ្វើដំណើរផ្សេងទៀត ជាពិសេស អ្នករស់នៅសងខាងដងផ្លូវ។ បានបន្ដថា ក្នុងនាមរដ្ឋបាលក្រុង និងក្នុងនាមលោកផ្ទាល់ សូមថ្លែងអំណរគុណយ៉ាងជ្រាលជ្រៅចំពោះវត្តមានអស់លោក លោកស្រីទាំងអស់ ដែលបានលះបង់ពេលវេលាដ៏មានតម្លៃរបស់ខ្លួនមកចូលរួមធ្វើយុទ្ធនាការផ្សព្វផ្សាយអនាម័យបរិស្ថាននាឱកាសនេះ។ លោកបានចាត់ទុកការចូលរួមនាពេលនេះគឺជាសក្ខីភាពបញ្ជាក់យ៉ាងច្បាស់អំពីការយល់ដឹង និងការចូលរួមក្នុងកិច្ចគាំពារបរិស្ថានក្រុងរបស់យើង ពិសេស សង្កាត់និមិត្ត។
លោកបានគូសបញ្ជាក់ថា កន្លងមកនេះ រដ្ឋបាលក្រុងប៉ោយប៉ែតធ្លាប់បានចូលរួមក្នុងចលនាប្រលងប្រណាំងទីក្រុងស្អាតទូទាំងប្រទេសចំនួន២លើក ដោយលើកទី១ ធ្វើឡើងនៅក្នុងឆ្នាំ២០១៥ ក្រុងប៉ោយប៉ែតទទួលបានជ័យលាភីផ្ការំដួល ១ទង និងលើកទី២ ឆ្នាំ២០១៨ ក្រុងប៉ោយប៉ែតទទួលបានជ័យលាភីផ្ការំដួល២ទង។ ដោយឈរលើកិត្យានុភាពរបស់ក្រុងនិងលក្ខណៈសម្បត្តិដែលមានស្រាប់រដ្ឋបាលក្រុងនឹងបន្តខិតខំសម្អាតអនាម័យបរិស្ថានក្នុង ក្រុងជាប្រចាំបន្ថែមទៀត ដើម្បីសម្រេចគោលដៅយកជ័យលាភីផ្ការំដួល ៣ទង នៅឆ្នាំ២០២១ ខាងមុខនេះ។
លោកអភិបាលក្រុងបានបន្ដទៀតថា ដើម្បីទទួលបានជ័យលាភីផ្ការំដួល ៣ទង រដ្ឋបាលក្រុង ត្រូវធ្វើសកម្មភាពជាច្រើនទៀតដូចជា ការដាំដើមឈើ ការរៀបចំសួនច្បារសាធារណៈ ការលាងសម្អាតផ្លូវថ្នល់ជាប្រចាំ ពង្រឹងការប្រមូលសំរាម ការអប់រំផ្សព្វផ្សាយអំពីការគ្រប់គ្រងសំរាមការធ្វើយុទ្ធនាការអប់រំផ្សព្វផ្សាយអំពីអនាម័យបរិស្ថានដោយដង្ហែជាក្បួនជាដើម។
លោកអភិបាលក្រុងបានលើកឡើងថា ចំពោះយុទ្ធនាការផ្សព្វផ្សាយអនាម័យបរិស្ថាន គឺត្រូវបានធ្វើជាប្រចាំក្នុង កិច្ចគាំពារបរិស្ថាន មិនមែនជាការទទួលខុសត្រូវរបស់រាជរដ្ឋាភិបាល ឬរដ្ឋបាលក្រុងផ្តាច់មុខឡើយ វាជាការទទួលខុសត្រូវរបស់យើងទាំងអស់គ្នា។ ហេតុដូចនេះ យើងទាំងអស់គ្នាត្រូវចូលរួមក្នុងសកម្មភាពថែរក្សាការពារបរិស្ថានឱ្យបានគង់វង្ស ដើម្បីជាគុណប្រយោជន៍ដល់ខ្លួន ក៏ដូចជាមនុស្សជាតិ សត្វនៅលើភពផែនដីទាំងមូល។
លោកក៏បានជំរុញដល់ក្រុមការងារគ្រប់គ្រងសំរាមក្រុង រដ្ឋបាលសង្កាត់ និងអង្គភាពពាក់ព័ន្ធ ត្រូវសហការគ្នាធ្វើការហាមឃាត់ និងអនុវត្តន៍វិធានការផាកពិន័យស្របតាមខ្លឹមសារនៃអនុក្រឹត្យលេខ១១៣៕
