ភ្នំពេញ៖ ចេញផ្សាយ ថ្ងៃចន្ទ ១០រោច ខែជេស្ឋ ឆ្នាំជូត ទោស័ក ព.ស ២៥៦៤, ត្រូវនឹងថ្ងៃទី១៥ ខែមិថុនា ឆ្នាំ២០២០។
ការប្រកួតកីឡាសូហ្វតេន្នីសជ្រើសរើសជើងឯកថ្នាក់ជាតិ លើកទី៤ និងពានរង្វាន់សម្តេចក្រឡាហោម ស ខេង លើកទី៧ ប្រចាំឆ្នាំ២០២០បានចាប់ផ្តើមដំណើរការថ្ងៃទី១ហើយពីថ្ងៃទី១៥ដល់ថ្ងៃទី១៩ ខែមិថុនា ឆ្នាំ២០២០ នៅទីលានសហព័ន្ធកីឡាសូហ្វតេន្នីសកម្ពុជា នៃពហុកីឡដ្ឋានជាតិអូឡាំពិក។
យោងតាមមន្ត្រីបច្ចេកទេសសហព័ន្ធកីឡាសូហ្វតេន្នីសកម្ពុជាបានឱ្យដឹងថា សម្រាប់ការប្រកួតជើងឯក ថ្នាក់ជាតិនេះមានវិញ្ញាសាដាក់ឱ្យប្រកួតចំនួន៧ ខណៈការប្រកួតពានរង្វាន់សម្តេចក្រឡាហោម ស ខេង មានវិញ្ញាសាចំនួន៤ មានវិញ្ញាសាក្រុមបុរស–នារី និងឯកត្តជនយុវជនក្រោម១៥ឆ្នាំ បុរសនារី ដោយប្រើប្រាស់ទីលានប្រកួតចំនួន៤។
ព្រឹត្តិការណ៍នេះមានប្រតិភូ គ្រូបង្វឹកកីឡាករ កីឡាការិនីចូលរួមប្រជែងមេដាយចំនួន៦៤នាក់ក្នុងនោះមានកីឡាករ ៣៩នាក់ និងកីឡាការិនី២៤នាក់មកពីសមាគម–ក្លឹបចំនួន៦។ សមាគម-ក្លឹបកីឡាសូហ្វតេន្នីសចំនួន៦នេះមានដូចជាក្រសួងមហាផ្ទៃ អគ្គស្នងការនគរបាលជាតិ ក្រសួងការពារជាតិ ខេត្តកំពង់ស្ពឺ ខេត្តកំពង់ឆ្នាំង និងក្លឹបអង្គការមិត្តសម្លាញ់។
បើតាមការបញ្ជាក់របស់ឯកឧត្តម ឧត្តមសេនីយ៍ឯក ជា ប៊ុនហេង អនុប្រធានទី១សហព័ន្ធកីឡាសូហ្វតេន្នីកម្ពុជាមានប្រសាសន៍កន្លងទៅថ្មីៗនេះថា ព្រឹត្តិការណ៍ទាំងពីរនេះនឹងជួយពង្រឹងគុណភាពបច្ចេកទេសរបស់កីឡាករ កីឡាការិនីឡើងវិញ ក្រោយពីការសម្រាកអស់រយៈពេលជាច្រើនខែ ដោយសារវិបត្តិជំងឺកូវីដ–១៩៕
