(ភ្នំពេញ)៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានសម្រេចតែងតាំង លោកឧត្តមសេនីយ៍ត្រី ឈឿន សុចិត្ត ស្នងការរងខេត្តកណ្ដាល ទៅជាស្នងការនគរបាលខេត្ត ជំនួសលោកឧត្តមសេនីយ៍ទោ អ៊ាវ ចំរើន ដែលត្រូវតែងតាំងជានាយករង មន្ទីរប្រឆាំងគ្រឿងញៀន។
នេះបើតាមប្រកាស ស្ដីពី ការផ្ទេរភារកិច្ច និងតែងតាំងមុខតំណែង មន្ដ្រីនគរបាលជាតិ របស់សម្ដេចក្រឡាហោម ស ខេង ដែលបណ្ដាញព័ត៌មានយើង ទទួលបាននៅល្ងាចថ្ងៃទី២៧ ខែមករា ឆ្នាំ២០២០នេះ។
ពិធីផ្លាស់ប្ដូរស្នងការខេត្តកណ្ដាល នឹងធ្វើឡើងនៅព្រឹកថ្ងៃទី៣០ ខែមករា ឆ្នាំ២០២០ ក្រោមអធីបតីភាព នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ និងលោកបណ្ឌិត ម៉ៅ ភិរុណ អភិបាលខេត្តកណ្ដាល។
លោកឧត្តមសេនីយ៍ទោ អ៊ាវ ចំរើន បានកាន់ជាស្នងការនគរបាលខេត្តកណ្ដាល អស់រយៈពេលជាង១០ឆ្នាំមកហើយ ដែលបានសម្រេចលទ្ធផលជាច្រើន នៅតាមមូលដ្ឋានក្នុងការរក្សាសន្ដិសុខ និងសណ្ដាប់ធ្នាប់សាធារណៈ ជូនប្រជាពលរដ្ឋ ជាពិសេសបង្ក្រាបបទល្មើសផ្សេងៗនៅក្នុងខេត្ត៕
