ភ្នំពេញ៖ ចេញផ្សាយ ថ្ងៃសៅរ៍ ៤រោច ខែស្រាពណ៍ ឆ្នាំជូត ទោស័ក ព.ស ២៥៦៤, ត្រូវនឹងថ្ងៃទី៨ ខែសីហា ឆ្នាំ២០២០។
ហេតុការណ៍ធ្លាក់យន្តហោះនៅឥណ្ឌា៖ យ៉ាងហោចណាស់មនុស្ស១៧នាក់បានស្លាប់ និងជាង១០០នាក់ផ្សេងទៀតបានទទួលរងរបួសនៅពេលយន្តហោះដឹកអ្នកដំណើរនៃក្រុមហ៊ុនអាកាសចរណ៍ឥណ្ឌាមួយគ្រឿងឈ្មោះAir India Express ដែលដឹកជនជាតិឥណ្ឌាជាប់នៅបរទេសដោយសារកូវីដ១៩នោះ ដោយខណៈពេលចុះនោះកង់យន្តហោះបានរត់ធ្លាក់ចេញពីផ្លូវក្នុងពេលមានភ្លៀងធ្លាក់នៅជិតទីក្រុង កូស៊ីកូដេ កាលពីយប់ថ្ងៃសុក្រទី៧សីហា។
យន្តហោះBoeing-737នេះដឹកអ្នកដំណើរនិងសមាជិកយន្តហោះសរុប១៩០នាក់មកពីក្រុងឌុយបៃនៅមជ្ឈិមបូព៌ា ក្នុងនោះមានទារកទារិកា១០នាក់ផង។
រូបភាពទូរទស្សន៍បានបង្ហាញបុគ្គលិកជួយសង្គ្រោះបានរើកកាយគំនរខ្មោចយន្តហោះនៅក្នុងពេលភ្លៀងកំពុងធ្លាក់។យន្តហោះបានបាក់ជាពីរកំណាត់បន្ទាប់ពីពោះយន្តហោះរយះពេលវាធ្លាក់ចូលប្រឡាយជំរៅ១០ម៉ែត្រនៅខាងក្រោម។
រដ្ឋមន្ត្រីអាកាសចរណ៍ស៊ីវិលឥណ្ឌា លោកហាឌីប ស៊ីង ពូរី បានប្រាប់សារព័ត៌មាន DD Newsថា «ដោយសារអាកាសធាតុ យើងមិនអាចចុះយន្តហោះនេះទេនៅគ្រាដំបូង ដូច្នេះអ្នកបើកបានហោះក្រឡឹងច្រើនជុំ មុនសំរេចចិត្តចុះចតជាថ្មីចេញពីទិសផ្សេង»។
លោកពូរី បានអោយដឹងទៀតថា អាជ្ញាធរបានព្យាយាមសង្គ្រោះអ្នកដំណើរភាគច្រើនបំផុត ដោយសារតែយន្តហោះមិនបានផ្ទុះឆេះនៅពេលវាធ្លាក់ចូលជំរាលផ្លូវ។
ការិយាល័យអភិបាលរដ្ឋ កេរ៉ាឡា កន្លែងដែលយន្តហោះធ្លាក់ បាននិយាយថា មនុស្ស១៧នាក់បានស្លាប់និង១៧៣នាក់រងរបួស។
វាជាគ្រោះថ្នាក់អាកាសចរណ៍អាក្រក់បំផុតចាប់តាំងពីឆ្នាំ២០១០ នៅពេលយន្តហោះនៃក្រុមហ៊ុនអាកាសចរណ៍ Air India Expressមួយទៀតមកពីឌុយបៃដូចគ្នាបានចុះធ្លាក់ផ្លូវនៅក្រុង ម៉ាន់ហ្កាឡ័រនិងធ្លាក់ចុះជំរាលភ្នំសម្លាប់មនុស្ស១៥៨នាក់៕
ប្រភព៖ www.rasmeinews.com
