ភ្នំពេញ៖ ចេញផ្សាយ ថ្ងៃអាទិត្យ ៤រោច ខែភទ្របទ ឆ្នាំជូត ទោស័ក ព.ស ២៥៦៤, ត្រូវនឹងថ្ងៃទី៦ ខែកញ្ញា ឆ្នាំ២០២០។
ភ្នំពេញៈ សួនច្បារថ្មី នៅតាមបណ្តោយ មហាវិថីកម្ពុជា ហាណូយ ដែលមានទទឹង ២០ ម៉ែត្រ និងបណ្តោយ ៥៥០ ម៉ែត្រ រៀបចំឡើងដោយ រដ្ឋបាលរាជធានីភ្នំពេញ ដើម្បីការពារដីសាធារណៈ និងជាកន្លែងសម្រាប់ហាត់ប្រាណ របស់ប្រជាពលរដ្ឋ នៅតំបន់ភ្នំពេញថ្មី ពេលនេះ មានផ្នែកជាច្រើន បានរួចរាល់ហើយ និងមានប្រជាពលរដ្ឋ មកដើរហាត់ប្រាណ ជាបណ្តើរៗហើយ។
លោក សំ សាមុត ប្រធានអង្គភាពសួនច្បារ រាជធានីភ្នំពេញ បានប្រាប់ឱ្យរស្មីកម្ពុជា ដឹងនៅថ្ងៃទី៥ ខែកញ្ញា ឆ្នាំ២០២០ថា សួនច្បារថ្មី ដែលរដ្ឋបាល រាជធានីភ្នំពេញ បាននឹងកំពុងរៀបចំ នៅលើដីសល់ពី ចំណីមហាវិថីកម្ពុជា ហាណូយ មិនមែនគ្រាន់តែ ដើម្បីការពារដីសាធារណៈ មិនឱ្យបាត់បង់ និងដើម្បីសោភ័ណភាព របស់រាជធានីនោះទេ គឺថែមទាំងបង្កើតបានកន្លែង សម្រាប់ប្រជាពលរដ្ឋ នៅតំបន់នេះ ហាត់ប្រាណ ថែមទៀតផង។
ប្រធានអង្គភាពសួនច្បារ ខាងលើ បានឱ្យដឹងទៀតថាៈ សួនច្បារដែលមានផ្ទៃដី ទទឹង ២០ ម៉ែត្រ និងបណ្តោយ ៥៥០ ម៉ែត្រនេះ ក្រៅពីដាំស្មៅ ផ្កា ដើមឈើ នៅមានផ្លូវ សម្រាប់ដើរហាត់ប្រាណ បំពាក់ឧបករណ៍ សម្រាប់ហាត់ប្រាណសាធារណៈ សួនកុមារ បន្ទប់ទឹក ចំណតយានយន្ត ដែលពេលនេះ ផ្នែកខ្លះ បានធ្វើរួចហើយ ប្រជាពលរដ្ឋ បានមកហាត់ប្រាណ ជាបណ្តើរៗ តែមិនទាន់មានបន្ទប់ទឹក សម្រាប់ប្រើនៅឡើយទេ។
សួនខាងលើនេះ មានទីតាំងស្ថិតនៅ ជាប់ខាងលិចមហាវិថីកម្ពុជា ហាណូយ ត្រង់ចំណុចមុខវិទ្យាស្ថាន ស្រាវជ្រាវ និងអភិវឌ្ឍន៍ព្រៃឈើ និងសត្វព្រៃ ជាគំនិតផ្តួចផ្តើមឡើង ដោយលោក ឃួង ស្រេង អភិបាលរាជធានីភ្នំពេញ ដើម្បីការពារដីសាធាណៈ និងបម្រើដល់ ផលប្រយោជន៍សាធារណៈ តាមរយៈការបង្កើតសួនច្បារ មានកន្លែងហាត់ប្រាណ មានកន្លែងក្មេងលេង សម្រាប់ប្រជាពលរដ្ឋ រស់នៅតំបន់ខាងលើ៕
ប្រភព៖ www.rasmeinews.com
