ភ្នំពេញ៖ ចេញផ្សាយ ថ្ងៃពុធ ៥កើត ខែកត្តិក ឆ្នាំជូត ទោស័ក ព.ស ២៥៦៤, ត្រូវនឹងថ្ងៃទី២១ ខែតុលា ឆ្នាំ២០២០។
បន្ទាយមានជ័យ៖ ថ្ងៃទី២១ ខែតុលា ឆ្នាំ២០២០
អាជ្ញាធរគ្រប់ជាន់ថ្នាក់កងកម្លាំងប្រដាប់ អាវុធគ្រប់ប្រភេទ ក្រុមយុវជនទាំងអស់បានរួមគ្នាចុះអន្តរាគមន៍ជួយសង្គ្រោះដល់ប្រជាពល រដ្ឋ ដែលកំពុងទទួលរងគ្រោះដោយសារតែជំនន់ទឹកភ្លៀង និងទឹកហូរធ្លាក់ពីប្រទេសថៃ ធ្វើឱ្យ ជន់លិចយ៉ាងធ្ងន់ធ្ងរនៅតំបន់មួយចំនួនក្រុងប៉ោយប៉ែត, ស្រុកអូរជ្រៅ, ក្រុងសិរីសោភ័ណ, និង ស្រុកមង្គលបូរី នៃខេត្តបន្ទាយមានជ័យ។
អភិបាលខេត្តបន្ទាយមានជ័យឯកឧត្តម អ៊ុំ រាត្រី បានឱ្យដឹងថា ដោយសារតែកាលពី ព្រឹកថ្ងៃ៤កើត ខែកក្ដិក ឆ្នាំជូត ទោស័ក ព.ស.២៥៦៤ត្រូវនឹងថ្ងៃអង្គារទី២០ ខែតុលា ឆ្នាំ២០២០ ទឹកជំនន់បានវាយប្រហារនៅក្រុងប៉ោយប៉ែត ដោយសារបាក់ទំនប់អាងអូរខៃដនដែលធ្វើឱ្យ ត្រូវលិចលង់ខ្លាំងជាងមុននោះ។ ភ្លាមៗនោះឯកឧត្តម ទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានដឹកនាំក្រុមការងារគ្រប់ភាគីពាក់ព័ន្ធចុះ ទៅជួយជម្លៀសប្រជាពលរដ្ឋ ដើម្បីរកកន្លែងសុវត្ថិភាពស្នាក់នៅបណ្តោះអាសន្ន។
ឯកឧត្តម អ៊ុំ រាត្រី បានលើកឡើងថា ដោយសារទំហំទឹកបុកមកខ្លាំងពេក ធ្វើឱ្យបាក់ ទំនប់អូរខៃដននេះ និងហូរកាត់ផ្លូវជាតិលេខ៥ ចំណុចភូមិកូនដំរី ហើយបុកទៅភូមិសូរិយា។
ឯកឧត្តម បានបញ្ជាក់ថា «កម្លាំងអន្តរាគមន៍ទាំងអស់ បានដឹកជញ្ជូនប្រជាពលរដ្ឋរង គ្រោះទៅកាន់ទីទួលសុវត្ថិភាពបានជោគជ័យ។ឯកឧត្តមទេសរដ្ឋមន្ត្រី គន់ គីម បានបញ្ជូន កម្លាំងប្រតិបត្តិការមកដោះស្រាយ ហើយក្នុងនោះដាក់ទូក និងកាណូត២០គ្រឿងប្រចាំការ ទីនេះ។ បន្ថែមលើនេះ ឯកឧត្តមបានឱ្យកម្លាំងចុះមើលតាមភូមិដែលរងការលិចលង់ និងរៀប ចំផែនការបន្តទៀត ដើម្បីត្រៀមដោះស្រាយបញ្ហាចំពោះមុខ។ ការរៀបចំផែនការចំពោះមុខគឺ មើលលើទីតាំងភូមិសាស្ត្រ ដែលខ្សែទឹកត្រូវហូរទៅទិសដៅណា ត្រូវត្រៀមជម្លៀសប្រជាពល រដ្ឋនៅទិសដៅនោះឱ្យបាន។
អភិបាលខេត្តបន្ទាយមានជ័យឱ្យដឹងដែរថា នៅតំបន់ខ្លះរបស់ក្រុងសិរីសោភ័ណ, ស្រុក អូរជ្រៅ, ស្រុកមង្គលបូរី នៅតែបន្តឡើងដោយសារតែទឺកនៅតែបន្តហូរធ្លាក់ពីប៉ែកខាងលើពី ព្រំដែនថៃ ដែលអាជ្ញាធរគ្រប់ជាន់ថ្នាក់ កងកម្លាំងប្រដាប់អាវុធគ្រប់ប្រភេទ នៅតែបន្តចុះអន្តរា គមន៍ជួយសង្គ្រោះប្រជាពលរដ្ឋលិចលង់ មកកាន់ទីទួលសុវត្ថិភាព និងចែកស្បៀងអាហារ បន្ទាន់ជាបន្តបន្ទាប់។
យោងតាមរបាយការណ៍របស់រដ្ឋបាលខេត្តបន្ទាយមានជ័យឱ្យដឹងថា គិតមកត្រីមថ្ងៃទី ២០ ខែតុលា ឆ្នាំ២០២០នេះ ជំនន់ទឹកភ្លៀងដែលបានកំពុងវាយប្រហារមកលើខេត្តបន្ទាយ មានជ័យ បានធ្វើឱ្យលិចលង់ស្រុក ក្រុងចំនួន៩ ឃុំ-សង្កាត់ចំនួន៦០ ធ្វើឱ្យបាត់បង់អាយុជីវិត មនុស្សចំនួន១៧នាក់ ប៉ះពាល់ជាង ២៦.០០០គ្រួសារ ប្រជាពលរដ្ឋជាង ៤.០០០គ្រួសារត្រូវ បានជម្លៀសទៅកាន់ទីទួលសុវត្ថិភាព ដំណាំស្រូវលិចលង់អស់ប្រមាណជាង៦០.០០០ហិកតា និងខូចខាតហេដ្ឋារចនាសម្ព័ន្ធផ្លួវថ្នល់ និងសំណង់សាធារណៈជាច្រើនទៀត៕
Sourcing: www.information.gov.kh
