ភ្នំពេញ៖ ចេញផ្សាយ ថ្ងៃសុក្រ ៣រោច ខែបុស្ស ឆ្នាំជូត ទោស័ក ព.ស ២៥៦៤, ត្រូវនឹងថ្ងៃទី១ ខែមករា ឆ្នាំ២០២១
ភ្នំពេញ ថ្ងៃទី៣០ ខែធ្នូ ឆ្នាំ២០២០
ព្រះករុណាព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា ព្រះអង្គបានចាត់ទុកថា ការទទួលបានតំណក់ប្រេងលើកដំបូងនេះ ជាការចាប់ផ្តើមបើកទំព័រប្រវត្តិសាស្ត្រថ្មី សម្រាប់ព្រះរាជាណាចក្រកម្ពុជា ក្នុងការអភិវឌ្ឍលើវិស័យឧស្សាហកម្មប្រេងកាត ដែលជាសក្តានុពលមួយ នាំឱ្យព្រះរាជាណាចក្រកម្ពុជាកាន់តែរីកចម្រើន និងជឿនលឿនជាបន្តទៀត។ នេះបើយោតាមព្រះរាជសាររបស់ព្រះករុណាព្រះមហាក្សត្រ ចុះថ្ងៃទី៣០ ខែធ្នូឆ្នាំ២០២០ ផ្ញើជូនសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ក្នុងព្រះរាជសារព្រះអង្គបានមានព្រះរាជបន្ទូលថា«ខ្ញុំមានសេចក្ដីសោមនស្សរីករាយ សូមចូលរួមអបអរសាទរសមិទ្ធផលបើកទំព័រប្រវត្តិសាស្ត្រថ្មី ដែលព្រះរាជាណាចក្រកម្ពុជា ទទួលបានតំណក់ប្រេងលើកដំបូង ស្របពេលថ្ងៃខួបអនុស្សាវរីយ៍លើកទី២២ នៃការអនុវត្តដោយជោគជ័យនយោបាយឈ្នះ ឈ្នះ របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបាននាំមកនូវសន្តិភាព ពេញបរិបូរណ៍ និងឯកភាពជាតិដ៏ពេញលេញ»។ ព្រះអង្គបានកោតសរសើរដ៏កក់ក្តៅចំពោះ សម្ដេចអគ្គមហាសេនាបតីតេជោ ហ៊ុន សែន ដែលបានដឹកនាំប្រទេសជាតិ ប្រកបដោយគុណបំណាច់ដ៏ថ្លៃថ្លា វីរភាពដ៏ឧត្តុង្គឧត្តម និងជាអគ្គមគ្គុទេសក៏ដ៏ឆ្នើម ដឹកនាំប្រទេសប្រកបដោយគតិបណ្ឌិត ធ្វើឱ្យព្រះរាជាណាចក្រកម្ពុជា មានសុខសន្តិភាព ស្ថិរភាពសង្គម និងការអភិវឌ្ឍជាតិ រីកចម្រើនលើគ្រប់វិស័យ។
ដោយឡែកក្នុងសារលខិតថ្លែងអំណរព្រះរាជគុណ ចុះថ្ងៃទី៣០ ខែធ្នូឆ្នាំ២០២០ របស់សម្ដេចអគ្គមហាសេនាបតីតេជោ ហ៊ុន សែន ទូលថ្វាយព្រះករុណាព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា សម្ដេចតេជោនាយករដ្ឋមន្ត្រីថ្លែងអំណរព្រះរាជគុណប្រកបដោយបីតិសោមនស្សរីករាយ ជាអនេកប្បការ ថ្វាយព្រះករុណាថ្លៃវិសេស ដែលព្រះអង្គទ្រង់ស្ដេចសព្វព្រះរាជហឫទ័យ ប្រោសព្រះរាជទាននូវការកោតសរសើរ និងប្រទានព្រះពរលើកទឹកចិត្តដល់ទូលព្រះបង្គំជាខ្ញុំ នាឱកាសរម្លឹកខួបអនុស្សាវរីយ៍លើកទី ២២ នៃការអនុវត្តដោយជោគជ័យ នយោបាយឈ្នះ ឈ្នះ គាប់ជួននឹងការបើកទំព័រប្រវត្តិសាស្ត្រថ្មីដែលព្រះរាជាណាចក្រកម្ពុជាទទួលបានតំណក់ប្រេងលើកដំបូង។
សម្ដេចតេជោបន្តថា ស្ថិតក្នុងវរោកាសប្រកបដោយមោទនភាពជាតិដ៏ខ្ពង់ខ្ពស់ជាអតិបរមានេះ ទូលព្រះបង្គំជាខ្ញុំ សូមព្រះបរមរាជានុញ្ញាតសារជាថ្មី ដើម្បីបញ្ជាក់នូវសក្ខីកម្មជាវិជ្ជមានពាក់ព័ន្ធនឹងមហាជោគជ័យជាប្រវត្តិសាស្ត្រធំធេងជាច្រើនឥតគណនា ដោយព្រះតេជានុភាព ពិសេសចាប់តាំងពីព្រះករុណាជាអម្ចាស់ជីវិតលើត្បូង ទ្រង់ស្ដេចឡើងគ្រងព្រះបរមសិរីរាជសម្បត្តិជាអង្គព្រះមហាក្សត្រ នៃព្រះរាជាណាចក្រកម្ពុជា ថ្មីៗនេះទៀត ជោគលាភប្រត្យក្សបំផុតនោះ គឺការទទួលបានដំណក់ប្រេងលើកដំបូង ជាការចាប់ផ្តើមបើកទំព័រប្រវត្តិសាស្ត្រថ្មី ក្នុងការអភិវឌ្ឍលើវិស័យឧស្សាហកម្មប្រេងកាតដែលជាសក្តានុពលសេដ្ឋកិច្ច នៃព្រះរាជាណាចក្រកម្ពុជាកាន់តែរីកចម្រើននិងជឿនលឿនជាបន្តបន្ទាប់ទៀត។ ជាថ្មីម្តងទៀត ទូលព្រះបង្គំជាខ្ញុំនិងភរិយា សូមលំឱនកាយក្រាបថ្វាយព្រះសព្ទសាធុការពរមហាប្រសើរ សូមព្រះករុណាជាអម្ចាស់ជីវិតលើត្បូង ទ្រង់ស្ដេចព្រះប្រកបដោយព្រះពុទ្ធពរទាំងបួនប្រការគឺ អាយុ វណ្ណៈ សុខៈ ពលៈកុំបីឃ្លៀងឃ្លាតឡើយ។ សូមព្រះករុណាជាអម្ចាស់ជីវិតលើត្បូងជាទីគោរពសក្ការៈ ទ្រង់ស្ដេចប្រោសព្រះរាជមេត្តាទទួលនូវអភិវន្ទនកិច្ច និងកតញ្ញូតាធម៌ដ៏ខ្ពង់ខ្ពស់ បំផុតអំពីទូលព្រះបង្គំជាខ្ញុំ៕
www.information.gov.kh
