ភ្នំពេញ៖ ចេញផ្សាយ ថ្ងៃ សុក្រ ៦កើត ខែ ចែត្រ ឆ្នាំ ជូត ទោស័ក ព.ស ២៥៦៤, ត្រូវនឹងថ្ងៃទី ១៩ ខែ មីនា ឆ្នាំ២០២១
លោក នូ ចំរើន អគ្គលេខាធិការ សហព័ន្ធខ្មែរកីឡាទោចក្រយានបញ្ជាក់ថា ការីករាលដាលនៃជំងឺកូវីដ-១៩ នាពេលបច្ចុប្បន្ននេះពិតជាប៉ះពាល់ខ្លាំងដល់ផែនការប្រមូលផ្តុំជម្រើសជាតិ ក៏ប៉ះពាល់ដល់គ្រប់ ប្រភេទកីឡាទាំងអស់ ដែលហ្វឹកហាត់ត្រៀមការប្រកួតកីឡាស៊ីហ្គេម លើកទី៣១ នាខែវិច្ឆិកា-ធ្នូ ឆ្នាំ២០២១ នៅប្រទេសវៀតណាម។
ថ្លែងប្រាប់សារព័ត៌មាន នៅថ្ងៃទី១៩ ខែមីនា ឆ្នាំ២០២១នេះ អគ្គលេខាធិការរូបនេះបន្ថែមថា រយៈពេលនៃការប្រកួតស៊ីហ្គេមកាន់ខិតជិតចូលមកដល់ដោយនៅពេលមិនដល់៧ខែផងក្នុងការប្រមូលផ្តុំក្នុងការហ្វឹកហាត់។ លោកបានលើកឡើងថា ក្រសួងអប់រំ យុវជន និងកីឡាបានប្រកាសរំសាយការហ្វឹកហាត់ប្រមូលផ្តុំ ដោយលើកទឹកចិត្តឱ្យសហព័ន្ធនានារៀបចំកម្មវិធីហ្វឹកហាត់ នៅតាមផ្ទះរៀងៗខ្លួន។ ដូច្នេះហើយ អ្វីដែលអាចធ្វើបាននៅក្នុងស្ថានភាពបច្ចុប្បន្នេះ គឺសហព័ន្ធទោចក្រយានបានដាក់ចេញនូវផែនការហ្វឹកហាត់ជាប្រចាំថ្ងៃ ទោះបីជាការប្រមូលផ្តុំមិនទាន់មាន ក្នុងអំឡុងពេលវិបត្តិកូវីដ១៩នេះ គឺថាយើងធ្វើការតាមដានកីឡាករ កីឡាការិនី ដោយដាក់កម្មវិធីកាលវិភាគហ្វឹកហាត់តាមផ្ទះ (ស្វ័យហ្វឹកហាត់) និងត្រួតពិនិត្យពីកម្រិតសិទ្ធផលបច្ចេកទេស ហាត់ កម្លាំងកាយ កម្លាំងស៊ុស និងភាពអំណត់របស់ពួកគាត់ធៀបនឹងថេរៈវេលាផ្សេងៗ ដោយប្រើប្រាស់ម៉ាស៊ីនវាស់ស្ទង់។
លោក នូ ចំរើន អះអាងទៀតថា សហព័ន្ធជំរុញលើកទឹកចិត្តកីឡាករឱ្យខិតខំហ្វឹកហាត់ទ្វេដងទាំងម៉ោងហ្វឹកហាត់ និងថ្ងៃហ្វឹកហាត់ ដោយយើងសង្កេតថា ពេលវេលាកាន់តែកៀកមែនទែនហើយ សម្រាប់ការចូលរួមស៊ីហ្គេមឆ្នាំនេះ។ លោកបានបញ្ជាក់ថា បើសម្លឹងមើលប្រទេសជិតខាងក្នុងតំបន់វិញ គេកំពុងបង្កើនការហ្វឹកហាត់ត្រៀមនេះបានយ៉ាងល្អ ហេតុដូចនេះយើងមិនអាចដេកដួលតាមបរិបទនៃវិបត្តិជំងឺកូវីដ១៩បែបនេះបាននោះទេ។ ក្នុងនាមតំណាងសហព័ន្ធខ្មែរកីឡាទោចក្រយាន អគ្គលេខាធិការរូបនេះបានបង្ហាញនូវក៏អំណរគុណចំពោះប្រមុខរាជរដ្ឋាភិបាល និងថ្នាក់ដឹកនាំគ្រប់ជាន់ថ្នាក់ដែលបានផ្តល់វ៉ាក់សាំងដល់កីឡាករ កីឡាការិនី ដើម្បីបង្ការ និងការពារការឆ្លងជំងឺកូវីដ១៩ និងត្រៀមខ្លួនសម្រាប់ការហ្វឹកហាត់ និងការចូលរួមប្រកួតលក្ខណៈអន្តរជាតិនានា នាពេលខាងមុខ។
ជាមួយគ្នានោះ តំណាងឱ្យសមាជិកប្រតិបត្តិ និងកីឡាករ កីឡាការិនីទាំងអស់បានបង្ហាញនូវសេចក្តីត្រេកអរ និងកក់ក្តៅបំផុត ដែលឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម និងជាប្រធានសហព័ន្ធខ្មែរកីឡាទោចក្រយាន ដែលតែងតែយកកចិត្តទុកដាក់ដល់សុខទុក្ខកីឡាករ កីឡាការិនី គ្រូបង្វឹក និងមន្រ្តីបច្ចេកទេស និងផ្តល់អនុសាសន៍ណែនាំជាប់ជានិច្ច ក្នុងបរិបទនៃវិបត្តិជំងឺកូវីដ-១៩នេះផងដែរ៕
www.information.gov.kh Sourcing
