កិច្ចប្រជុំសាមញ្ញលើកទី១០ របស់ក្រុមប្រឹក្សាខេត្តសៀមរាប អាណត្តិទី៣

(សៀមរាប)៖ នាព្រឹកថ្ងៃព្រហស្បតិ៍ ទី១២ ខែកុម្ភ: ឆ្នាំ២០២០ នៅសាលប្រជុំធំ សាលាខេត្ត ក្រោមអធិបតីភាព ឯកឧត្តម អុឹង ហឿន ប្រធានក្រុមប្រឹក្សាខេត្តសៀមរាប ឯកឧត្តម ទៀ សីហា អភិបាល នៃគណ:អភិបាលខេត្ត ព្រមទាំងវត្តមានឯកឧត្តម លោកជំទាវសមាជិក សមាជិកាក្រុមប្រឹក្សាខេត្ត លោក លោកស្រីអភិបាលរងខេត្ត តំណាងអាជ្ញាធរជាតិអប្សរា នាយក នាយករងរដ្ឋបាលសាលាខេត្ត នាយក នាយករងទីចាត់ការចំណុះសាលាខេត្ត មេបញ្ជាការ មេបញ្ជាការងកងកម្លាំងប្រដាប់អាវុធ ប្រធាន អនុប្រធានមន្ទីរ អង្គភាព និងអ្នកពាក់ព័ន្ធប្រមាណជិត ៩០នាក់ បានចូលរួម ។

អង្គប្រជុំបានអនុវត្តតាមគោលការណ៍របស់រាជរដ្ឋាភិបាលកម្ពុជាដែលបានចែង ក្នុងគោលបំណងពិនិត្យ ពិភាក្សា និងតាមដានការងាររបស់រដ្ឋបាលខេត្ត រដ្ឋបាលក្រុង ស្រុក មន្ទីរ អង្គភាព ស្ថាប័នពាក់ព័ន្ធទាំងអស់ក្នុងខេត្ត ដែលបានអនុវត្តកន្លងមក ។ ក្នុងកិច្ចប្រជុំនោះដែរ មានរបៀបវារ:ចំនួន៤ យកមកធ្វើការពិនិត្យ ពិភាក្សា ដោះស្រាយ និងអនុម័តលើសំណើនានាដូចជា÷

១- ពិនិត្យ និងអនុម័តលើសេចក្តីព្រាងកំណត់ហេតុកិច្ចប្រជុំសាមញ្ញលើកទី៩ របស់ក្រុមប្រឹក្សាខេត្ត កាលពីថ្ងៃទី១១ ខែកម្ភ: ឆ្នាំ២០២០ ។
២- ពិនិត្យ ពិភាក្សា និងអនុម័តលើសេចក្តីព្រាងរបាយការណ៍ប្រចាំខែកម្ភ: ឆ្នាំ២០២០ ស្ដីពីការអនុវត្តការងារ របស់រដ្ឋបាលខេត្តសៀមរាប ។
៣- ពិនិត្យ ពិភាក្សា និងអនុម័តលើសំណើសុំចាត់តាំងសមាសភាពក្រុមប្រឹក្សាខេត្ត ០១រូប ដើម្បីចូលជាសមាជិកគណ:កម្មការរៀបចំគម្រោងរបស់រដ្ឋបាលខេត្តសៀមរាប ។
៤- បញ្ហាផ្សេងៗ ។

នៅក្នុងរបៀបវារ:ទី៤ ឯកឧត្តម អភិបាលខេត្ត បានធ្វើការណែនាំ និងដាក់ចេញផែនការជាច្រើនជាពិសេសការពង្រឹងសន្តិសុខសណ្តាប់ធ្នាប់ហេដ្ឋារចនាសម្ព័ន្ធ ការសម្អាតអនាម័យ និងរៀបចំសោភ័ណភាពទីក្រុងដើម្បីអបអរសាទរក្នុងឱកាសបុណ្យពិធីចូលឆ្នាំខ្មែរខាងមុខ ។ បញ្ហាប្រយុទ្ធប្រឆាំងនឹងជម្ងឺផ្លូវដង្ហើម កូវីដ -19 ក៏ស្ថិតក្នុងរបៀបវារៈសំខាន់ផងដែរ ដែលត្រូវបង្កើនការយកចិត្តឱ្យបានខ្លាំងក្លាលើការទប់ស្កាត់ ការផ្សព្វផ្សាយទូលំទំលាយដល់ប្រជាពលរដ្ឋបានយល់ដឹង និងបន្តកិច្ចសហការជាមួយក្រសួងសុខាភិបាល សមត្ថកិច្ចពាក់ព័ន្ធ ដើម្បើយកឈ្នះលើជម្ងឺកូវីដនេះ ៕