ថ្ងៃអង្គារ៍ ៩រោច ខែផល្គុន ឆ្នាំកុរ ឯកស័ក ព.ស ២៥៦៣ ត្រូវនិងថ្ងៃទី ១៧ ខែ មីនា ឆ្នាំ ២០២០។
ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានមានប្រសាសន៍ ប្រាប់ប្រធានសមាគមជប៉ុន-កម្ពុជា អំពីវិធានការទប់ស្កាត់ជំងឺកូវីដ-១៩ ក្នុងរយៈពេលវែង ឬក៏ខ្លីនៅកម្ពុជា ដោយសម្ដេចតេជោបានបញ្ជាក់ថា ជំងឺនេះគឺជាបញ្ហាដែលកម្ពុជាអាចគ្រប់គ្រងបាន ប៉ុន្តែអ្វីដែលជាបញ្ហាចម្បងនោះ គឺបញ្ហាជំងឺភ័យខ្លាច។ នេះបើតាមការឱ្យដឹងរបស់ ឯកឧត្ដម អ៊ាង សុផល្លែត ជំនួយការសម្ដេចតេជោ បន្ទាប់ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យឯកឧត្ដម តាកាហាស៊ី ហ្វ៊ូមីអាគី(Takahashi Fumiaki) ប្រធានសមាគមជប៉ុន-កម្ពុជា ចូលជួនសម្ដែងការគួរសម និងពិភាក្សាកាងារ នាព្រឹកថ្ងៃទី ១៧ ខែមីនា ឆ្នាំ២០២០ នៅវិមានសន្តិភាព។
នៅក្នុងជំនួបនោះ ឯកឧត្តម Takahashi Fumiaki បានថ្លែងអំណរគុណជូនសម្ដេចតេជោ ដែលបានអនុញ្ញាតឱ្យនាវា Wester Dam បានចូលចតនៅក្រុងព្រះសីហនុ កាលពីពេលកន្លងទៅនេះ ដែលនៅលើនាវានោះ ក៏មានជនជាតិជប៉ុនផងដែរ ហើយជនជាតិជប៉ុនទាំងនោះ ក៏បានវិលត្រឡប់ទៅកាន់ប្រទេសជប៉ុនវិញ ដោយសេចក្ដីសុខ។ ជាមួយនេះ ឯកឧត្តម ក៏បានគោរពជម្រាបជូន សម្ដេចតេជោនាយករដ្ឋមន្ត្រី អំពីស្ថានភាពទូទៅពាក់ព័ន្ធនឹងជំងឺកូវីដ-១៩ នៅប្រទេសជប៉ុន រួមទាំងករណីជំងឺកូវីដ នៅលើកប៉ាល់ Diamond princess ហើយឯកឧត្តមក៏បានជម្រាបជូនសម្ដេចផងដែរថា ប្រតិភូដែលឯកឧត្តមនាំមកកម្ពុជាពេលនេះ គឺជាប្រតិភូអ្នកវិនិយោគ ដែលមានចំណាប់អារម្មណ៍ ហើយកំពុងតែធ្វើការយ៉ាងមមាញឹក នៅក្នុងការវិនិយោគនៅក្នុងកម្ពុជា។ ឯកឧត្ដមបានបន្ដថា ប្រតិភូអ្នកវិនិយោគទាំងនេះ គឺផ្ដោត ទី១ លើវិស័យហេដ្ឋារចនាសម្ព័ន្ធ ដែលមានការប្រើប្រាស់សារធាតុរកឃើញថ្មី ដើម្បីធ្វើផ្លូវថ្នល់ ដោយចំណាយថវិកាតិច ទី២ ការផលិតសាប៊ូ ដែលជាសាប៊ូសម្អាងកាយ និងទី៣ គឺការជំរុញការវិនិយោគពាណិជ្ជកម្ម រវាងប្រទេសទាំងពីរ ឱ្យមានភាពសកម្មឡើងថែមទៀត។
ជាការឆ្លើយតប សម្ដេចតេជោ ហ៊ុន សែន បានថ្លែងអំណរគុណ ចំពោះឯកឧត្តមតាកាហាស៊ី ដែលបានចែករំលែក នូវព័ត៌មានពាក់ព័ន្ធជាមួយនឹងជំងឺកូវីដ-១៩ ។ សម្ដេចតេជោ ក៏បានជម្រាបជូនប្រតិភូទាំងមូលអំពីស្ថានភាពជាទូទៅនៃជំងឺកូវីដ-១៩ ដែលទើបតែនឹងកើតឡើង នៅកម្ពុជារយៈពេលថ្មីៗនេះប៉ុណ្ណោះ។ សម្ដេចតេជោបានមានប្រសាសន៍ថា បញ្ហាជំងឺកូវីដ-១៩ គឺជាបញ្ហាដែលយើងអាចគ្រប់គ្រងបាន ប៉ុន្តែអ្វីដែលជាបញ្ហាចម្បងនោះ គឺបញ្ហាជំងឺភ័យខ្លាច។ ក្នុងនេះដែរ សម្ដេចតេជោ ក៏បានជម្រាបជូន ប្រតិភូអំពីវិធានការទប់ស្កាត់ បញ្ហាក្នុងករណីដែលមានជំងឺកូវីដ-១៩នេះ ក្នុងរយៈពេលខ្លី ៦ខែ និងរយៈពេលវែង ដោយសម្ដេចបានថ្លែងថា រដ្ឋាភិបាលកម្ពុជា បានមានផែនការរួចជាស្រេចហើយ ដើម្បីដោះស្រាយបញ្ហាជំងឺនេះ ក្នុងករណីដែលជំងឺនេះ នៅមានក្នុងរយៈពេលវែង ឬក៏ខ្លីនៅកម្ពុជា ឬនៅលើពិភពលោក។
យ៉ាងណាក៏ដោយ សម្ដេចតេជោក៏បានស្វាគមន៍ អ្នកវិនិយោគដែលកំពុងវិនិយោគនៅកម្ពុជា និងអ្នកវិនិយោគ ដែលទើបមកជួបសម្ដេច នៅពេលនេះ ដោយសុំកុំឱ្យមានការភ័យបារម្ភអ្វី លើបញ្ហាដែលកំពុងតែជួបប្រទះនេះ ព្រោះកម្ពុជាគឺកំពុងតែ មានវិធានការទប់ស្កាត់ហើយ៕
